سجلت صابة المشمش بولاية القيروان خلال الموسم الفلاحي الحالي ارتفاع مقارنة بالسنة الفارطة وينتظر أن تبلغ حوالي 18.200 طن، أي بزيادة تقدر بـ 700 طن حسب تقديرات الإدارة الجهوية للتنمية الفلاحية بالقيروان.
الزيادة هاذي رجعت الحركية للحقول والضيعات خصوصا مع انطلاق موسم الجني، اللي شهد توافد عدد كبير من التجار من داخل ومن خارج الولاية باش يشريوا كميات كبيرة من المشمش ويتم نقلها عبر الشاحنات للولايات الأخرى وين تتباع في الأسواق.
القيروان معروفة بزراعة المشمش وعندها أكثر من 580 ألف شجرة موزعة على أصناف مختلفة كيما "البيوضي" و "خد حليمة" و "الوردي" و"الشاشي" الأصناف هاذي محلية وتتميّز بجودة عالية وإنتاج وفير خاصة وأنها متأقلمة مع مناخ الجهة.
أغلب الإنتاج يتركز في معتمديات حفوز السبيخة حاجب العيون الشبيكة، والقيروان الجنوبية وين تتجاوز المساحات المغروسة 3000 هكتار ومعظمها من الغراسات السقوية اللي تعتمد على الري المنتظم، وهو ما ساعد في تحسين المردودية.
الصابة القوية لهالسنة تعطي أمل كبير للفلاحين والتجار وتساهم في دفع الدورة الاقتصادية الريفية بالجهة خاصة في ظل تحسّن الطلب على المشمش في السوق المحلي.